Ceramah Bahasa Bugis : “HIKMANA PUASA RAMALANGNGE”

Ceramah Bahasa Bugis :

“HIKMANA PUASA RAMALANGNGE”

Sininna Umma Selleng Malebbi Engkae Hadere!

            De’gaga maserro lebbi ripapole ri lalenna iyae wettue, sangadinna topada engka sukkuru mappoji ri sesena Puang Allah Taala, Puang Marajae naripakaraja, Puang Malebbie naripakalebbi, Puang matanrewe naripakatanre, Puang Pamasei namserro akkamase risininna ripancajinna, tanra akkamasena natopada engka mupa makko-kkoe nawereng umuru malampe, tubu majjappa, adidsi-disingeng, enrengnge topa paimeng kesempatan nettia teppe’ natopada engkasi makkulle patekkai ajeta manguju ri iyae onrongnge maddeppu-deppungeng pasilennererngi …Mamuarei engkaki simata namasei Puang Allah Taala pannennungengi pakkasieiyange ri laena Insya Allah. Amin .

            Salawa nennia pappassalama ri ale malebbi’na Nabitta Muhamma SAW, Nabi mancajie pammase, tiwi apatiroang, jellorekki laleng malempu, laleng patujue, nennia pattike’ki riatassalangnge, passalama’ki pole apusangengnge, enrengnge topa paimeng mancajie akkacoereng malebbi ri lino lettu ri ahera’ metti insya Allah. Amin.

Sininna Umma Selleng Malebbi Engkae Hadere !

            Rilalenna iyae wennie engkato maelo uwala judul ceramah iyanaritu : “Hikmana Puasa Ramalangnge”. Narampei Puang Allah Taala rilalenna Akorang malebbie makkeda :

يَآايَهُّاَ الَّذِيْنَ آمَنُوْا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِيْنَ مِنْ قَبْلِكُمْ لَعَلَّكُمْ تَتَّقُوْنَ

Bettuanna   : “E… sininna tau mateppe’e, riwajirengngi risesemutu menneng puasae, pada toha riwajirernna ri umma-umma maddioloe, barekkuammengngi pada engkako metau”.

Sininna Umma Selleng Malebbi Engkae Hadere !

            Rilalenna iyae aya’e, napannassangekki puang Allah Taala awajikenna puasae. Naikkia parellu riajeppui makkeda aga riyasengnge puasa ?. Naiya riyasengnge puasa iyanaritu mattahang, agaro ritahang ? iyanaritu : ritahangngi anrewe, inungnge, sideppe’we sibawa baineta yae’ga nalakkaitta iyaro tau purae mabbene/mallakkai (yapo iya de’topa), nennia sininna gau-gaue, ada-adae enrengnge nawa-nawa salae riwettu mappuasata. Jaji iyaro puasae seddi ujiang battoa riseseta idi’ umma sellengnge. Engka tau biasa makkutana, makkeda magasiro naengka riyasengnge puasa ?  engka saisanna tau panritata rampei makkeda naiya mula-mulanna naengka riyasengnge puasa iyanaritu peristiwa engkae pura nalaloi tomatowatta Nabi Adam sibawa bainena Sitti Hawa riwettu monrona rilaleng Suruga naikkia napugaui larangenna Puang Allah Taala. Iayanaritu riwettu nanrena bua Khuldie, iyaro wettuero leppangiro buae ri tigerro’na Nabi Adam siuleng ettana. Aga mellau toba’na ri Puang Allah Taala. Narisuro tona mappuasa siuleng sukku esso-wenni. Bettuanna ada de’nengka nammanre esso-wenni gangka siuleng ettana , jaji makkoniri puasae riwettunna Nabi Adam. Iyatosi idi Umma’na Nabita Muhamma saw riwajirekki mappuasa esona uleng Ramalang, naikkia tobukamua riwenninna.

Sininna Umma Selleng Malebbi Engkae Hadere !

            Rilalenna seddie riwaya rirampe makkeda : saba’na naengka riyasengnge Puasa, iyanaritu : riwettunna napancaji Puang Allah taala sewwa-sewwae, napancajini akkalengnge, riwettunna tepu ripancaji akkalengnge aga namakkedana Puang Allah Taala : e… akkaleng angngoloko ri iya ! aga nangngolo tona akkalengnge risesena Puang Allah Taala. Makkedasi Puang Allah Taala : e… akkaleng soro’ko ! aga nasoro tona akkalengnge turusiwi parentana Puang Allah Taala. Nainappasi makkutana Puang Allah Taala makkeda : e… akkaleng, niga iko nigato iya ? aga nappebalina akkalengnge makkeda : idi’na Puakku, iya tona atam-Mu malemmae. Aga nariganti’na akkalangnge ri Puang Allah Taala makkeda : e… Akkaleng ikona atakKu kaminang malebbi. Nainappa naipancajisi  Puang Allah Taala Napesue, riwettunna tepuna napesue, aga nakkedana Puang Allah Taala : e… napsu angngoloko ! naiya napsue de’gaga ette’ de’gaga sumu. Makkedasi Puang Allah Taala : e… napsu soro’ko ! naiya napsue de’gaga gau de’gaga kedo, aga nakkutanana Puang Allah Taala : e… napsu niga pale iko nigato iya ? aga nappebalina napsue makkeda : iyaro iya, iya mato, iko, iko mato. Aga narihukumna napsue ri Puang Allah Taala, nariyaddemperenna muttama rilalenna api mallumpae 100 Taung ettanna. Aga nariwettu narapi’na 100 taung, naripassu’na, nariutanaisi makkeda : e… napsu niga iko nigato iya, naikkia pada-padamui pappebalinna : iya, iya mato, iko, iko mato.

Akhirnya riayaddemperenni napsue muttama rilalenna neraka Ju’ (neraka lapar) 100 taung ettana maliwaseng temmanre tenninung. Aga nariwettu narapina 100 taung, naripassu’na nariutanaisi makkeda : e… napsu niga iko nigato iya ? aga nainappani nangakui alena napsue makkeda : iya’na atammu malemmae, idi’ tona Puak-Ku.

Jaji rekkuaenaro saba’na napparelluangngi Puang Allah Taala puasae sarekkuammengi nariyulle patunrui napsutta. Nasaba napsue tonangennai setangnge untu pakabilimpilikki, majeppu nigi-nigi tau napoji simata turusi napsunna, cinnana, malomototu ripakabilimpiling ri setangnge. Engka 2 (dua) riwatakkaleta nigi-nigi tau turusiwi elo’-cinnana majeppu tau napakabilimpilittu setang, iyanaritu : babuwae, nennia riyawana babuwae. Aga elo’ –cinnana babuwae, iyanaritu simata meloi riliseri, meloi manre, meloi minung. Agatosi elo’-cinnana yawana babuwae, iyanritu simata melo’i simata sideppe makkunraie. Jaji iyanari saba’na napparulluangngi Puang Allah Taala puasae sarekkuammengngi nariyulle naripatunru elo’-cinnana babuata nennia yawana babuata nasaba iyanari marommo pakabilimpilingngi taue nabiasa pugau gau’ sala naceccae Puang Allah Taala nennia surona.

Sininna Umma Selleng Malebbi Engkae Hadere !

            Makkonie urapi paletturekki, mammuarei naengka gunana lao riidi maneng terutama lao rialeku.

وَللهُ وَلِيُّ التَّوْفِيْقِ وَالنَّجَاح

السَّلاَمُ عَلَيْكُمْ وَرَحْمَةُ اللهِ وَبَرَكَاتُه